تیگیرمانچی

سن کیتگن دن کیین اویه م ساووق

تاغ ده گی قارلر اوزاق دن یاووق

سن کیتینگ

سن کیتگندن کیین باغم ده گی گل

سولیب گل گه اوقشه می قالدی

سن کیتینگ

سن کییتگندن کیین یول اییلانچ

اسمان بلند

ییر قتیق

قویاش ایسیق اییمس

یان ده گی اریغ شرشر لب آق می دی

سن کیتینگ

سن کیتگندن کیین باغم ده گی یکه درخت

همه قطاری

جقنب گل دن

بونیگه سیرغه تاق می دی

سن کیتینگ

 سن کیتگن دن کیین دنیا قرانغو

آی بوتون ایمه س

سو اچیق

قولمدن اوجگن بلبلم

قیتیب سحر اوقیب گل گه باق می دی

سن کیتینگ

سن کیتگن دن کیین ........

سیوگی حق دور حق سیوگی سیوگیلیک نر دانه دور

گل نی سیوگن شمع نی سیوگن بلبل و بروانه دور

اوت توشوب آق سو ایچینده سیوگی دورسرمایه سی

سیوگی جام و سیوگی مینا ساقی و می خانه دور

اشرف مخلوق توغلدی سیوگی آته آنه سی

سیوگی سیز بنیاد قویلگن قصر بیر ویرانه دور

حق ده ییتی منصور حلاج انالجق فیضی دن

سیومه گن انسان اوچون منصوربیردیوانه دور

اویه ایزلب کیتمه گی عاقل کیشی صحرا قدر

سیوگی دورکیم اول قره تاش بیرمقدس خانه دور

توتیا دور سیوگلم باسکن یوزینگ سجده اوچون

حلقه سالگی من قلاق ده گرچه ایاغ زولانه دور

تور کیتایلین آسیابان سیوگی ملکین ایزله بان

سیوگی سیز اوشبو جهان افسانه دور افسانه دور

         " آق یوزینگه آینه بولی قره زلفینگه تراغ

 استه سنگ یارینگ بولی استه مه سنگ اندن بیراغ "

جقنه گن گلزار ایچینده بوی باشینگ بیر کوروب

قامت سروینگ نی کورماق گه گدا من باغ مه باغ

ایتی تاغ آره سی دن دوشینگ نی بیر بار ایشیتب

بلبلم آوازی دیب گیزدیم یوزینگ دن تاغ مه تاغ

عمر ادا قان ایغله دیم کورماق گه زار دور کوز لریم

یولچی گه جانم بیرای سندن کیلتورسه بیر سوراغ

لطف یوزیدن ای بری وش حالم نی بیرسورماق اوچون

بوسه غام گه بیر قدم  کلبم گه یاندیرسنگ چراغ

کوی دی بس کیم آسیابان خوش صورتینگ هجریدن

لاله دیک صجرا گه قالگن دور یوره گی داغ داغ

مونچه لیک اورمه یوره گیم بند زندانم جرس

کوک گه ایتمس ناله و فریاد ارمانم جرس

ایتمه گی آحرده بو درد و الم جان باریچه

چون حبیبیم دور طبیبیم دارو درمانم جرس

بو حیات دور شو قدر باق غنچه و گل عمری گه

لحظه دور بیر لحظه دور عمر غزل حوانم جرس

حسرت و فتنه قولیدن بولدی انسان بوری دیک

کویله گی قان گه بویلگن بیر کنعانم جرس

رندلر بزمی گه شمع دور درس و تعلیم و وفا

بول ادا توغری یانیب شمع شبستانم جرس

نقطه دانم نی بیلور دردم منی دور نقطه سیز

درس نی تلقین قیل گن استاد و دیوانم جرس

چون اوزاق دور بو سفر منزلگه ایتماقم کیره ک

توغری یول بیر مینگ حطا دور دارغه کاروانم جرس

اسیابان تا قولینگدن کیلسه قیل مهرو رفا

چون که بو جان نیچه کون دور تن گه مهمانم جرس

بویوره ک نی ناله سیدن ناله قیلگه ی ناله لر

دود آهم دن توشوب دور آی یوزیگه هاله لر

کوکسومه مینگ داغ قویبدور بو جفا برور فلک

باقسه بولگه ی سر خجل صحرا ده موندن لاله لر

سرو قدیم نی بوکوب دور بی وفالیک لر یوکی

باغ ده ایغلر حالمه مجنون تالی دیک یاله لر

تامچی تامچی کوز یاشیم دن سوردی سیل بنیاد نی

کوککه بیتگه ی کوز یاشیم دن قارو یامغور ژاله لر

درد سیز! دردیم نی سورمه سینگه ایتماق نی کیره ک

آق ساچم سرین نی بیلسون دردی یوق یاش باله لر

فراقینگ داغیگه کویگن بو حالم دن نی استرسن

قرانغوکیجه لرکوزم یلغوزدریا کبی اقگی

امین دریا باشین الگن بوتاغم دن نی استیرسن

یوراگیم گل کبی سولدی گلستان قدرینی بیل می

کوزم یاشی بلن اوسکن بوباغم دن نی استیرسن

وصالینگ یولیده بولدی الف دیک قامتم دال دیک

تنم بی جان بولب اخر بوجانم دن نی استیرسن

توروب کیتینگ قوچاغم دن کوزم ارقینگده قان یغلر

اسینگ بیرناز بلن کیل گن قوچاغم دن نی اسیترسن

یوره ک ده اوت توشوردی لعل میگونینگ جفا بس دور

لبینگ لعلینی سورماگن دو داغم دن نی استیرسن

قره خالیگه بیردی لر ثمرقند و بخارانی
دو داغ میگونینگ آلدی قولمدن برچه دنیانی
چیچک نازیک لیگیدن دور که بلبل ناله لرایتگی
چمنده کورمه گی کیمسه منی دیک زارو شیدانی
سحر بیر نازایله غنچه آچیب آغزنی گل بولگی
سینینگ غنچه لبینگ حیرتگه سالگن برچه رعنانی
خرامینگ طرز دن طاوس وجیلان لر چیکیب حسرت
بیری باغ دن چقیب ایکینچی سی ترک ایتی صحرانی
نی چون مجنون بولیب شیداچقتی لیلانی عشقی دن
ایکی کوزینگ خجل ایتگی جهانده برچه لیلانی
الف دیک قامتینگ گلزار ایچینده بیر صنوبردور
نچوک ارزان ایتیب تنگریم سنگه بو قد بالانی
باشیمگه تاش یاغرهر یانه دن مجنون شیدا دیک
قره زلفینگ توشوردی باشمه آخر بو سودانی
حساب سیزیاره سالدینگ بغرمه کیپریک لرینگ بیرلن
اوزینگ هم اولدیریب هم تشلادینگ دنیاده غوغانی
یولینگ ده بیر کورای دیب زارو حیران (آسیابان )دور
نه بولگی بیر کرم ایلب سیوینتیر سنگ بو رسوانی